ദേവ ഹരിതം പദ്ധതിക്ക് ജില്ലയിൽ തുടക്കമാവുന്നു; ജില്ലയിലെ ആദ്യ പദ്ധതി കൊടിയത്തൂരിൽ

 ദേവ ഹരിതം പദ്ധതിക്ക് ജില്ലയിൽ തുടക്കമാവുന്നു; ജില്ലയിലെ ആദ്യ പദ്ധതി കൊടിയത്തൂരിൽ

മൂന്നര ഏക്കറിൽ ഒരുങ്ങുന്നത് ഫലവൃക്ഷങ്ങൾ, ഔഷധസസ്യങ്ങൾ, നക്ഷത്ര വനം, പച്ചക്കറി തോട്ടം ,ദശപുഷ്പതോട്ടം എന്നിവ

മുക്കം: ഹരിത കേരള മിഷൻ്റെ ആഭിമുഖ്യത്തിൽ നടപ്പാക്കുന്ന ദേവ ഹരിതം പദ്ധതിക്ക് കോഴിക്കോട് ജില്ലയിൽ തുടക്കമാവുന്നു. ജില്ലയിൽ ആദ്യമായി പദ്ധതി നടപ്പാക്കുന്നത് കൊടിയത്തൂർ ഗ്രാമപഞ്ചായത്തിലാണ്. ഹരിത കേരള മിഷൻ്റെ പച്ച തുരുത്ത് പദ്ധതിയുമായി ചേർന്നാണ് പദ്ധതി നടപ്പാക്കുന്നത്.

കൊടിയത്തൂർ ഗ്രാമപഞ്ചായത്തിലെ പന്നിക്കോട് ദേവസ്വം ബോർഡിൻ്റെ അധീനതയിലുള്ള ശ്രീകൃഷ്ണപുരം ശ്രീ കൃഷ്ണ ക്ഷേത്ര പരിസരത്തെ മൂന്നര ഏക്കർ സ്ഥലം ഉപയോഗപ്പെടുത്തിയാണ് പദ്ധതി നടപ്പാക്കുന്നത്. ക്ഷേത്രം ട്രസ്റ്റി ബോർഡിൻ്റെ ഉൾപ്പെടെ സഹായത്തോടെയാണ്  പദ്ധതി നടപ്പാക്കുന്നത്.

പരിസ്ഥിതി ദിനാചരണത്തിൻ്റെ ഭാഗമായി ഗ്രാമപഞ്ചായത്ത് നഴ്സറിയിൽ സ്വയം ഉൽപ്പാദിപ്പിച്ച ഔഷധസസ്യങ്ങളും ഫലവൃക്ഷതൈകളും, സോഷ്യൽ ഫോറസ്ട്രി ഡിപ്പാർട്ട്മെൻ്റ്, കൃഷി വകുപ്പ് എന്നിവർ നൽകുന്ന തൈകളളും ഉൾപ്പെടെ ഏഴായിരത്തോളം തൈകൾ വെച്ച് പിടിപ്പിക്കാനാണ് ഉദ്ദേശിക്കുന്നതെന്ന് ഗ്രാമ പഞ്ചായത്ത് പ്രസിഡൻറ് ഷംലൂലത്ത് പറഞ്ഞു. തൊഴിലുറപ്പ് തൊഴിലാളികളും എൻ എസ് എസ് വളണ്ടിയർമാരുമാണ് തൈകളുടെ പരിചരണം ഏറ്റെടുത്തിരിക്കുന്നത്. * ചെത്തി, മന്ദാരം, തുളസി, പിച്ചകം ഉൾപ്പെടെയുള്ള ദശപുഷ്പങ്ങളും കൃഷി ചെയ്യുന്നുണ്ട്. 

പരമ്പരാഗതമായ ക്ഷേത്രങ്ങളിലെ കാവുകൾ പുനരുജ്ജീവിപ്പിക്കുക, ക്ഷേത്രങ്ങളിലെ ഉത്സവസമയത്തേക്കാവശ്യമായ പച്ചക്കറികൾ, പഴവർഗ്ഗങ്ങൾ, കിഴങ്ങ് വർഗങ്ങൾ എന്നിവ ഉൽപ്പാദിപ്പിക്കുക എന്നതും പദ്ധതിയുടെ ലക്ഷ്യമാണന്ന് സ്ഥലം സന്ദർശിച്ച ഹരിത കേരളം മിഷൻ ജില്ല കോ- ഓഡിനേറ്റർ പി. പ്രകാശ് പറഞ്ഞു. വിവിധ ഏജൻസിയുമായി സഹകരിച്ചാണ് പദ്ധതി നടപ്പാക്കുകുന്നതെന്നും ജില്ലയിലാദ്യമായി കൊടിയത്തൂരിൽ പദ്ധതിയാരംഭിക്കാനായത് വലിയ നേട്ടമാണന്നും അദ്ധേഹം പറഞ്ഞു. *

മുരിങ്ങകൃഷിയും, തീറ്റ പുൽകൃഷിയും

സ്വാതന്ത്ര്യത്തിൻ്റെ എഴുപത്തഞ്ചാം വാർഷികത്തിൻ്റെ ഭാഗമായി നടക്കുന്ന ആസാദി ക അമൃത് മഹോത്സത്തിൻ്റെ ഭാഗമായി പ്രദേശത്ത് അരയേക്കറോളം സ്ഥലത്ത് മുരിങ്ങകൃഷിയും പദ്ധതിയുടെ ഭാഗമായി നടപ്പിലാക്കാന്നുണ്ട്. ക്ഷേത്രത്തിലെ ഗോക്കൾക്കായി തീറ്റപ്പുൽകൃഷിയും പദ്ധതിയുടെ ഭാഗമായുണ്ട്. കന്നുകാലികൾ ഉൾപ്പെടെ കയറി കൃഷി നശിപ്പിക്കാതിരിക്കാൻ സ്ഥലത്തിന് ചുറ്റും വേലി കെട്ടി സംരക്ഷിക്കും. 

 ഗ്രാമ പഞ്ചായത്ത് പ്രസിഡൻ്റ് ഷംലൂലത്ത്, ഹരിത കേരള മിഷൻ ജില്ല കോ ഓഡിനേറ്റർ പി. പ്രകാശ്, ഗ്രാമ പഞ്ചായത്ത് വൈസ് പ്രസിഡൻ്റ് ഷിഹാബ് മാട്ടുമുറി, സ്റ്റാൻ്റിംഗ് കമ്മറ്റി അധ്യക്ഷരായ ദിവ്യ ഷിബു, ആയിഷ ചേലപ്പുറത്ത്, പഞ്ചായത്ത് അസി: സെക്രട്ടറി പ്രിൻസിയ, തൊഴിലുറപ്പ് പദ്ധതി അസി: എൻജിനീയർ റാസിഖ്, നാട്ടുകാരും ക്ഷേത്രം ഭാരവാഹികളുമായ ബാബു മൂലയിൽ, പി. അബ്ദു, ഐ. ശങ്കര നാരായണൻ, വിജയൻ പൊലുകുന്നത്ത്, സുബ്രമണ്യൻ തുടങ്ങിയവരും സ്ഥലം സന്ദർശിച്ചു. 

ചിത്രം: ഗ്രാമപഞ്ചായത്ത് പ്രസിഡൻ്റ് ഷംലൂലത്ത്, ഹരിത കേരള മിഷൻ ജില്ല കോ ഓഡിനേറ്റർ പി.പ്രകാശ് എന്നിവരുടെ നേതൃത്വത്തിൽ സ്ഥലം സന്ദർശിക്കുന്നു

2: ദേവഹരിതം പദ്ധതി നടപ്പാക്കുന്ന ദേവസ്വം ബോർഡിൻ്റെ അധീനതയിലുള്ള പന്നിക്കോട് ശ്രീകൃഷ്ണപുരം ക്ഷേത്രത്തിൻ്റെ സ്ഥലം